Pininindugan kan Department of Foreign Affairs (DFA) an saindang legal na kapangyarihan na mag-isyu nin Philippine visa, ini kasunod kan pahayag ni Ombudsman Jesus Crispin Remulla na an nasambit na katungdan daa nasa irarom kan Department of Justice (DOJ).
An simbag kan DFA sa Ombudsman, malinaw na nakasurat sa Administrative Code of 1987 an kapangyarihan kan mga konsulado sa Pilipinas na mag-isyu nin visa asin bako ini basta ipinagtao sana kan DOJ.
Kinontra man kan ahensya an suhestyon ni Remulla na ibalyo sa pribadong service provider an pagproseso nin visa.
Paliwanag kan DFA, pwedeng magtabang an mga pribadong kompanya sa pag-ako asin pagpaparikas kan aplikasyon, alagad nagdanay na katungdan kan gobyerno an pagsusuri, pag-apruba o pagtanggi sa mga aplikasyon.
Mientras tanto, idinepensa man kan DFA an 14-day visa-free para sa mga Chinese national, na ipinatupad daa susog sa direktiba ni Pangulong Ferdinand Marcos Jr. tanganing mapakusog an negosyo, pamumuhunan, turismo asin relasyon kan mga namamanwaan kan Pilipinas asin China.
Ini matapos na magluwas an mga report na igwang mga dayuhan partikular na an mga Chinese national na inaabuso an visa-free arrangement para sa mga ilegal na gibo arog kan illegal scam hubs, illegal employment asin orog na sa mga ilegal na operasyon kan Philippine Offshore Gaming Operator o POGO.
Lininaw kan ahensya na dapat imbestigaran kan mga awtoridad an maski arin na naireport na pang-aabuso sa visa-free entry privilege, alagad bako daa boot sabihon kan mga insidenteng ini na igwang iregularidad sa parte kan DFA o ilegal an pagpapatupad kan polisiya.
Idineny man kan DFA an daa pag-isyu kaini nin pekeng pasaporte pati an mga alegasyon nin korapsyon o pagtrato sa mga serbisyo kaini para pagkakitaan, pininindugan kaini na gabos na nakokolektang bayad kan ahensya napupunta sa gobyerno.
