Ipinagtanggol kan Department of Foreign Affairs (DFA) an saindang legal na kapangyarihan na mag-isyu nin Philippine visa, kasunod kan pahayag ni Ombudsman Jesus Crispin Remulla na ini daa yaon sa irarom kan Department of Justice (DOJ).
Malinaw na ipinahayag kan DFA na nakasaad sa Administrative Code of 1987 an kapangyarihan kan mga konsulado sa Pilipinas na mag-isyu nin visa, asin bako ini basta ipinagkaloob sana kan DOJ.
Tinutulan man kan ahensya an suhestyon ni Remulla na ilipat sa pribadong service provider an pagproseso kan visa.
Paliwanag kan DFA, makakatabang an mga pribadong kompanya sa pag-ako asin pagpadali kan aplikasyon, alagad an gobyerno man giraray an may katungdan na mag-eksamin, mag-aprobar, o magsayuma.
Sa ibong kaini, ipinagtanggol man kan DFA an 14-day visa-free para sa mga Chinese national, na ipinautob susog sa direktiba ni Presidente Ferdinand Marcos Jr. para mapakusog an kalakalan asin turismo.
Ini kasunod kan mga report na igwang mga dayuhan, orog na an mga Chinese national, na inaabuso an visa-free arrangement para sa mga ilegal na gibo arog kan illegal scam hubs asin operasyon kan Philippine Offshore Gaming Operator (POGO).
Malinaw na sinabi kan ahensya na dapat imbestigaran an anuman na nai-report na pang-aabuso sa visa-free entry privilege, alagad bako daa ini nangangahulugan nin iregularidad sa DFA o ilegal an pagpautob kan polisiya.
Pigpapara man kan DFA an mga akusasyon nin pag-isyu nin pekeng pasaporte asin korapsyon, na iginiit na an gabos na nakokolektang bayad kan ahensya napupunta sa gobyerno.
