Ibinasura ni Department of National Defense Secretary Gilberto Teodoro Jr. an otro na pangapudan kan Tsina na halion an BRP Sierra Madre sa Ayungin Shoal, pinanindugan na mayo nin hurisdiksyon an Beijing na makialam sa mga aktibidad kan Pilipinas sa nasabing lugar.
Segun ki Teodoro, nakabase sa United Nations Convention on the Law of the Sea o UNCLOS asin international law an mga ginigibo kan Pilipinas sa Ayungin Shoal.
Sinabi ini ni Teodoro matapos otro na akusaron kan Chinese Embassy an Pilipinas na nagsasagibo nin mahiwas na pagkukumpuni asin pagpapatibay sa BRP Sierra Madre tanganing magkaigwa nin permanenteng presensya sa Ayungin.
Mientras tanto, sinabi man kan Department of Foreign Affairs na mayo nin kasunduan an Pilipinas asin Tsina na nag-oobliga sa Manila na halion o i-tow away an BRP Sierra Madre. Segun sa DFA, kaiba an Ayungin Shoal sa Philippine exclusive economic zone asin continental shelf.
Base man sa 2016 arbitral ruling sa irarom kan UNCLOS, ibinilang an Ayungin Shoal bilang low-tide elevation na nasa laog kan Philippine exclusive economic zone. Pinanindugan ni Teodoro na mayo man nin karapatan an Tsina na magdikta sa Pilipinas manungod sa presensya kan BRP Sierra Madre sa nasabing lugar.
