Muling ipinagpatuloy ngayong Martes, Nobyembre 10, 2026, ang impeachment trial ni Vice President Sara Duterte sa Senado, na umabot na sa ika-41 araw ng paglilitis. Pormal na kinumpirma ang pagkakaroon ng quorum matapos dumalo ang 13 senator-judges, habang pinangunahan ni Senator-Judge Bam Aquino ang pambungad na panalangin.
Sa pagpapatuloy ng paglilitis, iniharap ng defense team ang ikalawa nitong testigo na si Island Garden City of Samal Assessor Engr. John Kenneth Enumerables. Inaasahang magbibigay siya ng paglilinaw hinggil sa ari-ariang iniuugnay sa Pangalawang Pangulo at sa kanyang asawang si Atty. Manases Carpio.
Layunin ng depensa na kontrahin ang alegasyon ng prosekusyon na hindi isinama o hindi wastong idineklara ni VP Duterte sa kanyang Statement of Assets, Liabilities, and Net Worth (SALN) ang nasabing ari-arian sa Samal, Davao del Norte.
Nauna nang humarap noong Lunes ang unang testigo ng depensa na si Davao City Assessor Engr. Jaime G. Adalin. Gayunman, umani siya ng puna mula sa ilang senador dahil sa hindi niya pagbibigay ng tuwiran at malinaw na sagot sa ilang katanungan sa panahon ng kanyang testimonya.
Kaugnay nito, inusisa ni Senator-Judge Vicente Sotto III si Presiding Officer Francis “Chiz” Escudero tungkol sa mga posibleng parusa sa mga testigong magsisinungaling o hindi magbibigay ng tuwirang sagot sa harap ng impeachment court.
Bilang paglilinaw, sinabi ni Escudero na may kapangyarihan ang hukuman na ideklarang contempt ang sinumang testigong magsisinungaling o magbibigay ng evasive answers. Maaari rin silang humarap sa kasong perjury kung ito ay maisasampa sa regular na hukuman.
