Labing nakakagadit an air pollution sa Metro Manila huli sa selebrasyon kan Bagong Taon, susog sa grupong nagbabantay sa kalidad kan duros na Breathe Metro Manila.
Gamit an datos na naguno, natukoy an Air Quality Index sa Metro Manila sa paagi kan online map kan Breath Metro Manila.
Basado sa datos, nakamate an nagkapira sa pinakamalalang kondisyon nin duros iyo an Hilaga asin Gitnang parte kan National Capital Region magpuon bisperas kan Bagong Taon, Disyembre 31 hasta Enero 1, na nag aabot sa “hazardous level,” sigun ki Clarity Movement Regional Account Manager Ethel Garcia.
An peak kan air pollution an nairehistro bandang alas-2:00 nin mag oomagahon kun saen sumipa sa 500-600 an Air Quality Index, an lebel na ikinokonsiderar komo “labing peligruso.”
Paliwanag ni Garcia, nakakaalarma ini orog na para sa mga bulnerableng grupo siring kan mga may edad na na may respiratory problems o mga aki na igwang asthma, kaya man kaipuhan soboot na protehiran an saindang sadiri.
Kan nakalihis na aldaw, pasado alas-3:00 nin pagkahapon, nagluluwas sa mapa na nagsakat sa “emergency level” an kalidad kan duros sa Caloocan Sports Complex na nangangahulugan na dapat magtinir sa laog kan harong an mga tao asin isarado an saindang mga bintana asin pintuan.
Mientrastanto an nagkapirang lugar man sa Metro Manila siring kan Kalayaan Avenue-South Avenue Intersection an nairehistro komo “very unhealthy” pag abot sa kalidad kan duros. Kaya inaabisuhan an mga indibidwal na may respiratory disease na magtinir na sana sa harong asin magsulot nin N95 face mask kun dae maiwasang magluwas.
Sigun man ki Garcia, nilalaomang mamarhay na an kalidad kan duros depende sa kamugtakan kan panahon asin hiro kan duros sa mga masunod na aldaw.
