Nanamlay an shares kan Airbus makalihis kaining kumpirmaron an ikaduwang isyu sa metal paneling kan nagkapirang A320 jets. An mga panel na gibo kan Sofitec Aero an nagluwas na may depektibong hibog asin kaipuhang inspeksyunon.
Pigkakarkulong labi sa 600 eroplano an posibleng apektado alagad pighurot kan Airbus na salbado pa man an mga biyahe.
Ini an tulong aldaw sana makalihis matapos an anunsyo dapit sa software recall sa haros 6,000 A320 huli man sa epekto kan solar flares sa flight-control system.
Nagkawsa ini nin mahewasang pagkauktaba sa operasyon kan nagkapirang airlines, partikular na sa Latin America asin Asia.
Huli man sa sunod-sunod na aberya, bumagsak an presyo kan Airbus shares sa Paris trading.
Nagtinir na nakamasid an mga regulators asin investors sa masunod na lakdang kan Airbus tangani na maibalik an tiwala sa saindang produkto.
