LINAOG kan drones kan Russia an airspace kan Poland kasuodmang aga nin Miyerkules, Setyembre 10.
Basado sa reports, inactivate kan Poland an saindang defense systems sa tahaw kan pagsasalakay kan Russian drones.
Katakod kaini, idineploy kan Poland asin kaalyado kaining North Atlantic Treaty Organization (NATO) an saindang military aircraft, kaibahan an US F-35 fighter jets na nagpapatrolya ngunyan sa himpapawid kan Poland tanganing i-monitor asin pugolan an lalo pang intrusion kan Russian drones.
Naireport man na an nagkapirang drones kan Russia an napabagsak. Sa ngunyan, isinarado na an Warsaw International Airport kan Poland.
Sigun man ki Polish Prime Minister Donald Tusk, nagpapadagos an isinasagibo nindang operasyon katakod sa multiple violations kan Russian drones sa airspace kan Poland.
Mahigot man na nakikipag-koordinar an PM sa defense officials katakod sa nasambitan ng development.
