Arestado kan mga otoridad an sarong aktibong miembro kan Philippine National Police makalihis an isinagibong search warrant operation kan mga otoridad katakos kan pagbalgar sa RA. 9165 o an Comprehensive Dangerous Drugs Act of 2002 asin RA 10591 o an Comprehensive Firearms and Ammunition Regulation Act sa Sitio Tgongtong, Brgy. Agdangan Baao Camarines Sur.
Pinangenotan kan SOU 5 kan PNP Drug Enforcement Group katuwang an iba pang Unit an operasyon na nagresulta sa pagkakaarestar ki alyas ‘Lito’ 44 anyos presenteng nakadistino sa PNP Highway Patrol Group asin kinukonsiderar na High Value individual.
Kumpiskado kan mga otoridad an apat na medium heat sealed transparent plastic sachet kan pinagtutubudan na shabu na kinakarkulong igwa ningabat na poco mas o menos 16.8 gramos. Sa ngunian, nasa custudiya na an suspek para sa magkakanigong disposisyon.
