Nakikipagtabangan an ama kan estudyante na responsable sa pambabadil sa Ateneo de Zamboanga University sa mga awtoridad asin sa ngonian mayo pa nin kaso sa ano man na krimen, segun pa ki Interior and Local Government Secretary Jonvic Remulla.
Sinabi ni Remulla na solo an nag-aktong 15-anyos na Grade 8 student asin mayo man nin kasabwat o grupo na imbwelto sa pagplano kan pag-atake. Duwang estudyante an nagadan sa insidente, kabale an suspechado na kan huri binadil an sadiri.
Ginamit kan estudyante an .40-caliber asin 9mm na badil na pagsasadiri kan saiyang ama na empleyado kan Bureau of Customs (BOC).
Segun ki BOC Commissioner Ariel Nepomuceno, nawalat an mga badil sa laog kan behikulo na ginamit sa paghatod kan solterito pasiring sa eskwelahan, na iyo an naging rason kan pag-agaw kaini asin pagdara sa laog kan campus.
Mientrastanto, piglinaw ni Remulla na an piskal an madesisyon kun liable an ama basado sa eksistidong ley asin sa resulta kan imbestigasyon. Bilang lakdang, temporaryong hinale an opisyal sa saiyang posisyon bilang district commander kan BOC Enforcement and Security Services sa Zamboanga Port mantang nagpapadagos an imbestigasyon.
