NAGA CITY- Kinondenar kan Philippine Army an nangyaring pananambang sa 2 police mobile kan Camarines Norte Police Provincial Office (CNPPO) na nangyari subagong mag-uumagahon sa banwaan nin Labo, Camarines Norte.
Sa entrevista kan Bombo Radyo Naga ki Col. Boots Regencia, Assistant Division Commander for Reservist and Retirees Affairs kan 9th Infantry Division, Philippine Army, sinaysay kaini na sarong makangirhat an nangyaring pananambang sa barangay Daguit asin apwera suboot sa mga pulis na biktima kaini, nadamay man an sarong sibilyan na nagsapo nin lugad makalihis na maipit sa bakbakan.
Sigon ki Regencia, tolong improvised explosive device (IED) an ginamit kan mga rebelde sa ambush na mahigot na pigpapangalad basado naman sa Comprehensive Agreement on Respect for Human Rights and International Humanitarian Law (CARHRIHL).
Sa ngonyan, kontrolado na suboot kan mga otoridad an nasambitang lugar mantang padagos man an pigkokondusir na hot pursuit operation kan duwang kompanya nin mga soldados na hale sa Sur asin Norteng direksyon para lapagon an mga rebelde.
Mientrastanto, binisto man an nagadan na pulis na si PO2 Richard Abad mantang irido man sinda PO2 Ronald Gutierrez; PO2 Ericson De Vera; PO1 Jeffrey Tarrobago; PO1 Pedro Valeros; PO1 Romar Umandap asin PO1 Johnson Espaṅa na gabos miyembro kan Camarines Norte Provincial Mobile Force Company (CNPMFC) kan CNPPO.
Marurumduman na tinambangan kan pigtutubudang mga NPA an duwang police mobile na nilulunadan kan mga biktima na nagkondusir nin internal security operation sa nasambitang banwaan asin pabalik na kuta na sa provincial command kan pauranan an mga ini nin bala kan mga rebelde.
