Nairehistro na an African Swine Fever o ASF sa nagkapirang orig sa sarong parte kan Libmanan, Camarines Sur.
Sa naging pahayag sa social media ni Mayor Edelson Marfil, LGU LIbmaann, sinaysay kaini na padagos man na pigbabantayan kan mga otoridad para madeterminaran kun pira na an kaso asin maibitaran an posibleng paglakop kan virus sa ibang orig sa lugar.
Tulos man na pig-iimplementar kan mga nanunungdan na opisina an kinakaipuhan na mga lakdang, kabali na an pagbantay asin pag-monitor sa mga lugar na posibleng apektado.
Mientrastanto, pinapagirumduman an mga hog raisers na istriktong magsunod sa mga lakdang sa biosecurity, arog kan regular na paglinig asin pagdisinfect kan mga kulungan asin pagpugol sa paglaog kan mga dae awtorisadong persona.
Pig-eenkaminar man an mga paraataman nin baboy na tulos na ipaabot sa Municipal Agriculture Office o Municipal Veterinarian an anuman na senyales nin helang o biglang pagkagadan kan saindang mga orig.
Padagos an pakikoordinar kan mga lokal na awtoridad sa Department of Agriculture asin iba pang nanonongdan na ahensya para mamonitor asin magresponde sa sitwasyon.
