NAGPAPADAGOS an Mabini Colleges Inc. sa pagkundusir nin Asynchronous class makalihis an duwang magkasunod na insidente nin bomb threat sa saindang eskwelahan.
Sa entrevista kan Bombo Radyo Naga ki Edwin A. Datan Jr., LPT, Designated Spokesperson kan nasambitan ng eskwelahan, sinaysay kaini na ini an kaenot-enoting pagkakataon na nangyari an siring na insidente sa saindang institusyon.
Dae suboot ini makatubod na nagkaribok sa saindang eskwelahan asin nagruluwasan an gabos na empleyado asin estudyante sa mga sakop na pasilidad huli sa insidente.
Nangyari an enot na insidente nin bomb threat kan nakalihis na Pebrero 18,aldaw nin Miyerkules na kun sain nahiling suboot an sarong surat na naglalaman nin bomb threat sa comfort room kan babae sa ground floor kan high school building na an nakahiling sarong canteen staff.
Kaya pag-abot nin petsa 19 nag-shift an saindang klase sa asynchronous class asin pag-abot nin petsa 20 ibinalik man sana an face-to-face class.
Alagad sa kaparehas na petsa, may nahiling na naman nin sarong surat na naglalaman na naman nin bomb threat sa kaparehas na lokasyon na nahiling man kan sarong student teacher.
Sigun ki Datan Jr., huli sa insidente, mas naghigot an seguridad kan eskwelahan, hinigutan an pagmonitor sa mga CCTV Camera, naghigot an mga bantay na guwardiya asin dae na basang-basang pinapalaog an mga bakong taga-Mabini College.
Sa mga nagpapadeliver sa online shopping, dae na tinutugutan na ibang tawo an makua kan bako niyang inorder na item. Kaipuhan an mismong nag-order kan item an magkua komo pag-iingat.
Sa ngunyan, mayo pan lead kun siisay an nasa likod kan duwang magkasunod na bomb threat sa Mabini Colleges asin an bagay na ini an pinauubaya na sana kan pamayuhan kan kolehiyo sa mga kapulisan na on going man an imbestigasyon.
