Nasa Pilipinas pa an puganteng si Charlie “Atong” Ang na nahahampang sa patung-patong na kasong kidnapping asin serious illegal detention sa mga korte sa Laguna asin Batangas katakod sa pagkawara kan mga sabungero, sigun ki Justice Secretary Fredderick Vida kan nakalihis na Martes.
Sinaysay kaini na mayo sa record kan Bureau of Immigration na nagluwas nin nasyon an negosyante.
Siring man, nilinaw ni Vida na dae piggigilid an posibilidad na nakaluwas ini nin nasyon huli ta igwa ining resources tanganing gibuhon an kamawotan kaini.
Pigsierto man ni Vida na dae nag-uuntok sa paghahanap an mga otoridad. Enot nang nagtangro si Interior Secretary Jonvic Remulla nin P10 milyon na pabuya para sa pag-arestar ki Ang.
Magin an Cambodia’s Ministry of Foreign Affairs and International Cooperation an nagtaram na mayo sa saindang nasyon si Ang makalihis an pahayag ni Remulla na nagpadara na nin liaison sa Cambodia na nagpasiring dumab si Ang.
