NAGA CITY- Nagpadara na suboot nin augmentation force an Camarines Sur Police Provincial Office (CSPPO) sa banwaan nin Siruma katakod kan nakataas na alert status sa gabot na mga PNP stations sa probinsya.
Ini an kinumpirmar ni P/Insp. Juniel Legazpi, hepe kan Siruma PNP sa entrevista kan Bombo Radyo Naga.
Sigon ki Legazpi, nagpadara na nin dugang na pwersa an CSPPO siring man an Philippine Army tanganing masierto an seguridad asin katuninongan sa nasambitang banwaan.
Mahigot man na pinahimutikan ni Legazpi an enot ng nagluwas na mga bareta hinggil sa suboot kan nrebeldeng New People’s Army (NPA) sa saindang lugar.
Posibleng na-misinterpret sana suboot kan nagkapirang mga residente kan mahiling ninda na nagdaralagan an mga kapulisan na nagdara nin paghandal sa publiko.
Sigon ki Legazpi, mayo sindang namomonitor na kaduda-dudang pangyayari asin hiro kn rebeldeng grupo.
Sa ibong kaini, pigsierto man kan opisyal na padagos pa nanggad an pigkokondusir nindang preventive patrols sa lugar tanganing masierto an seguridad sa nasambitang banwaan.
Marurumduman na kan bulan nin Pebrero, nagluwas an mga bareta na nagbaba suboot sa banwaan nin Siruma hale sa Tinambac an mga miyembro kan rebeldeng NPA kun saen nagdara ini nin paghandal sa mga namamanwaan.
