Aram baya nindo mga ka-bombo, sarong babae gikan sa California na labi an pagkamoot sa golf, naipuli an Guinness World Record sa paagi kan pagbugtak nin nasa 711 golf tees sa saiyang buhok.
Binisto an babae na si Anya Bannasch, 45-anyos kun saen saiyang naibulsa an titulo sa tabang man kan saiyang mga amiga.
Susog sa report tanganing maipuli an titulo para sa pig-apod na pinakadakol na golf tees sa buhok, si Anya kaibahan an saiyang amiga pinano nin golf tees an saiyang buhok sa laog kan 47 minutos.
Sigun sa babae, pangaturugan talaga kaini na mahiling an saiyang pangaran sa libro kan Guinness World Records.
Huli digde, saiyang minawot na maggibo nin kakaiba sa mundo kan golf na magigin interesante sa Guinness World Records.
Dugang pa nin Anya an saiyang titulo an gikan sa inspirasyon ki Joel Strasser, sarong record-breaker na indibidwal na nakapagpuli na nin manlaen-laen na titulo.
Sa ngunyan, labi na sana an kaogmahan na namatean kan babae huli sa saiyang trayumpo sa presente.
