Nagbilog na an gobyerno kan bagong task force tanganing magmanehar sa rehabilitasyon kan San Juanico Bridge.
Kasabay kaini an ipapautob na man an mga bagong safety protocols sa pinakahalabang tulay kan nasyon, kaibahan na an 24/7 security patrol sa tabang kan lokal na gobyerno asin law enforcement agencies.
Magkakaigwa man nin konkreting rerouting plan para sa mga heavy vehicles asin an itatatag kan sarong centralized Public Assistance Desk.
Sigun sa Office of Civil Defense (OCD) na primerong parte kan nasambitan ng task force, dae na tutugotan na magbalyo an mga pedestrian sa nasambitan ng tulay.
Sa halip, gagamiton na sana an mga light vehicle asin mga coaster na mabiyahe sa sainda.
Ini an opisyal na nagpuon kasuodma. Siring kan orihinal na plano, an mga RoRo vessel na an madara sa mga magagabat na cargo truck.
Pinagpepreparar man an mga Roro ports sa bilog na Leyte asin Samar province sa sierto na pagdakol kan mga seserbisyuhang lunadan.
Sigun sa Department of Public Works and Highways (DPWH), igwang structural damage sa nasambitan ng tulay kaya kinaipuhan na ipautob an tolong toneladang weight limits.
Kaipuhan gamiton kan mga mabalyo sa tulay an centerline asin dapat magin saro sana an pagbalyo, sa tabang na man kan pagmamando kan mga pigtalagang traffic enforcer.
Sa presente, nasa irarom kan Blue Alert an sitwasyon sa nasambitan ng tulay, Boot sabihon ini an kapreparaduhan na magsimbag sa anuman na emergency situation na pwedeng mangyari mantang pigsasairarom sa rehabilitasyon an sikat na San Juanico Bridge.
