Naghahagad an Estados Unidos nin “Concrete Action” gikan sa masunod na Prime Minister kan Iraq tanganing irayo an nasyon sa mga armadong grupong pro-Iran bago ibalik an pagpondo asin tabang sa seguridad, sabi kan sarong halangkaw na opisyal kan Martes. An namamahalang Coalition kan Iraq nagnominar ki Ali al-Zaidi bilang masunod na lider kaini, asin siya nakaresibe nin tulos na pag-omaw gikan ki US President Donald Trump, na dati nang naghuma na puputulon an gabos na suporta kan Estados Unidos kun an dating frontrunner na si Nouri al-Maliki magtukaw sa opisina.
Alagad susog sa sarong halangkaw na opisyal kan Departament kan Estados Unidos na nagsayuma na magpabisto, kaipuhan na atubangon ni Zaidi an “malabong hangganan” sa pag-ultanan kan mga armadong grupong pro-Iran asin kan estado sa nasyon na mayoriya kan Shia.
Sinuspinde kan Washington an mga pagbalyo nin kuwarta para sa mga kita sa lana—na inaasikaso kan Federal Reserve Bank of New York poon kan pagsalakay kan Estados Unidos sa Iraq kan 2003—siring man an tabang sa seguridad huli sa serye nin mga pag’atake laban sa mga interes kan Estados Unidos.
Sinabi man kan opisyal na an mga pasilidad kan Estados Unidos sa Iraq nagsapo nin labi sa 600 na pag-atake poon kan Pebrero 28, kan an Estados Unidos asin Israel naglansar nin giyera laban sa Iran.
An mga pag’atake nag’ontok pagkatapos kan sarong maluyang untok-putok sa pag-ultanan kan Estados Unidos asin Iran kan Abril 8, apwera sa mga pag’atake kan Iran sa Iraqi Kurdistan.
An Estados Unidos nagkusog nin pangigipit sa Iraq mantang nagluwas na si Maliki an pwedeng magin masunod na primer ministro. Durante kan saiyang nakaaging termino, an relasyon sa Washington nagraot huli sa mga akusasyon na siya haranihon na gayo sa Shia na gobyerno kan Iran asin nagpagrabe kan iriwal sa mga sekta.
An mga pag’atake kan mga armadong grupo sa Iraq tinamaan an embahada kan Estados Unidos sa Baghdad, mga pasilidad sa aeropuerto kan kabisera, asin mga oil field na pinapadalagan kan mga dayuhan na kompanya.
