Pigsierto ni Philippine National Police (PNP) Officer-in-Charge PLt. Gen. Melencio Nartatez Jr. na maagi sa tamang proseso an balasahan sa lado kan haralangkaw na opisyal kan PNP.
Sigun ki Nartatez maski ini an paramientras na namamayo sa pambansang pulisya, pigtawan duon kaini na dapat pa man giraray na sunudon an tamang paagi tanganing masierto na mayong nababalgar na regulasyon sa pagtatalaga kan mga opisyal.
Dugang pa kan opisyal, enkaso igwang pagbabago sa pwesto kan mga opsiyal, dapat magin preparado sinda huli ta mayong permanente sa saindang trabaho huli ta choice kan Presidente an saindang posisyon.
Marurumduman, dae pigsunod ni dating PNP Chief PGen. Nicolas Torre III an rekomendasyon kan National Police Commission (NAPOLCOM) katakod sa pigpautob kaining balasahan kan August 14 kun saen pigpapabalik komo number 2 man o chief of administration si Nartatez karibay ni PLt. Gen. Bernard Banac gikan sa Area Police Command – Western Mindanao.
Mientrastanto, piglinaw man ni Nartatez na marhay an saindang pag-ibahan ni Torre maski pigbalyo kaini an opisyal sa Mindanao.
