NAGA CITY- Padagos an pagtutok kan Barangay Child Protection Council sa mga programa para sa mga kaakian sa siyudad nin Naga.
Sa nagin paghampang sa mga kagawad kan media ni Amy Bacsa Barangay Kagawad kan Concepcion Pequeña,Naga City, sinaysay kaini na dakulang katabangan para sa mga kaaakian an mga programa na pigpapautob kan nasambitan ng opisina orog na an pagtutok asin pagsimbag sa mga nagbubungkaras na problema.
Sigun pa ki Bacsa, padagos an saindang pagmomonitor sa mga nairerehistrong jovenes na amay na nagbabados, pag-implementar kan Anti Bastos Law asin an mga jovenes na naiimbwelto sa mga salang gibuhon.
Katakod kaini, pigdadara soboot sa barangay an mga kaakian na nadadakop na naggigibo nin maraot tanganing kaulayon asin magsairarom sa counselling.
Para man sa kaso kan teenage pregnancy, naglangkaw an percentage kaini sa presente huli sa manlaen-laen na rason siring kan pamilya, pag-inom, pagbabarkada asin iba pa.
An nasambitan ng kaso an padagos na pigtutukan kan Barangay Child Protection Council tanganing mapugulan an paglobo kaini.
Sa ibong na lado, para man sa kaso kan child abuse, sa presente dikit sana an nairerehistro na dakulang katabangan sa pagproteher sa mga kaakian.
Sa ngunyan, pig-orgulyo na sana ni Bacsa na an mga programa na piglatag para sa mga kaakian an epektibo asin igwa man na naka-alokar na budget para sa masunod na taon.
