Nakapreperar na an mga opisyal kan Barangay Concepcion Pequeña sa Naga City para sa nilalaomang pagdagsa kan mga tawo sa Undas, partikularmentes sa mga paratinda sa palibot kan Concepcion Public Cemetery, na saro sa mga pinakadakulang pampublikong sementeryo sa siyudad.
Sa intrevista kan Bombo Radyo ki Amy Bacsa – Brgy. Kagawad, Concepcion Pequeña, Naga City, sinabi kaini na hanggang Nobyembre 1 sana pinapahintulutan an mga vendor na magtinda sa gilid kan sementeryo, pagkatapos kan Undas kaipuhan na nindang haleon an saindang mga paninda asin linigan an lugar na ginamit.
Segun ki Bacsa, dae na kaipuhan nin panibagong permit an mga vendor huli nakalista na an saindang mga pangaran ki Engr. Marfil. Igwa na man nin nakatakdang numero an kada paratinda, kaya maiiwasan an agawan sa pwesto.
Ipigpreparar man kan barangay an covered court komo parking area kan mga sasakyan kan mga madalaw sa sementeryo asin sinisigurado kan mga ini na ligtas an mga sasakyan na ipaparada sa nasambit na lugar.
Mientrasanto, nagpagiromdom ini sa publiko na dai magdara nin mga ipinagbabawal na gamit sa pagdalaw, alagad mas pinahigot pa ngunyan an seguridad sa lugar bilang parte kan preparasyon para sa Undas.
