Nakatalaan an Barangay Council kan Mabolo Naga City na magkondusir nin oryentasyon para sa mga residente manungod sa posibleng pagigin Highly Urbanized City (HUC) kan siyudad.
Sa intrevista kan Bombo Radyo Naga ki Arthur Matos, Barangay Captain, Mabolo, Naga City, sinaysay kaini na importante an pagpapaliwanag sa mga residente kan kahulugan kan pagigin HUC, siring man an posibleng epekto kaini sa mga barangay, orog na sa usaping ekonomiya, pagbubuwis, asin pagtao nin pondo.
Kinakaipuhan man na magkaigwa nin supisyenteng impormasyon an publiko bago an isasagibong plebisito tanganing masabutan kan mga namamanwaan an posibleng mga pagbabago asin implikasyon kan nasabing lakdang.
Kabali sa mga planong lakdang an pagsasaro kan diskusyon manungod sa pagigin HUC sa mga isasagibong barangay assembly, tanganing matawan nin oportunidad an mga residente na masabutan an usapin asin maaraman an posibleng positibo asin negatibong epekto kaini sa saindang komunidad.
Naglalaom an pamayo kan Barangay Mabolo na sa paagi kan nasabing oryentasyon, magigin mas malinaw sa mga residente an kahalagahan kan pagigin Highly Urbanized City kan Naga asin an posibleng mga implikasyon kaini sa saindang barangay.
