Arestado an sarong high-level individual sa ipigkundusir na anti-illegal drug operation na ginibo kan Camarines Sur Police Provincial Office sa pakikipagtabangan kan Presentacion Municipal Police Station sa banwaan kan Presentacion na nagresulta sa pagkadakop kan sarong Barangay Kapitan asin pagkakumpiskar kan 10.66 grams kan pigtutubudang shabu.
Sa intrevista kan Bombo Radyo Naga ki PltCol Josefa Sylvia Zape-Spokesperson CSPPO, sinabi kaini na ginibo an operasyon poco mas o menos alas 5:00 nin aga basado sa search warrant na target an nasabing opisyal kan barangay. An nasabing operasyon parte kan pinakusog na kampanya kontra sa iligal na droga sa probinsya kan Camarines Sur sa Pilipinas.
Nakumpiskar kan mga otoridad an 10.66 grams nin shabu sa pinangyarihan kan operasyon. An suspechado sarong punong barangay na may koneksyon suboot sa iligal na aktibidad base sa report kan police intelligence.
Mientrastanto, sa ipigkundusir na operasyon, 2 pidaso nin bala an narekober sa poder kan suspechado, na tulos isinairarom sa imbentaryo asin pag-analisar kan mga awtoridad.
Narekober man sa suspechado an sarong gamit na pigtutubodan na “anting-anting,” na komun na inaasosyar sa mga pagtubod na nagtatao suboot nin proteksyon laban sa kapahamakan. Piglinaw kan mga otoridad na isasairarom ini sa mahiwas na beripikasyon ngani na maaraman an tunay na naturalesa asin posibleng koneksyon kaini sa kaso.
Segun ki Zape, padagos an saindang intelligence monitoring asin operasyon kontra droga, ano man an paninindugan kan mga imbwelto. Tinawan man ninda nin duon an pagkadisganar kan komunidad sa mga opisyales na dapat kuta na mga law enforcer alagad imbwelto sa iligal na aktibidad.
Sa ngunyan, nagpapadagos pa an imbestigasyon sa kaso mantang nagtitinir na sa kustodiya kan mga otoridad an suspek para sa magkakanigong proseso.
