Pigpresentar na sa plenaryo kan Senado an Senate Bill 1587 o an prosopwesto na obhetong i-reset asin pormal na itakda an enot na regular Bangsamoro Election sa september 14, 2026.
Sa sponsorship speech ni Senate Majority Leader Juan Miguel Zubiri para sa prosopwesto, pigtawan duon kaini na pitong taon na an nakalihis puon kan maipasar asin maratipikahan an Bangsamoro Organic Law (BOL) alagad hasta sa ngunyan dae pa nakakaboto an mga namamanwaan kan BARMM.
Ini na an ikaapat na pagppauktaba kan BARMM elections asin kaipuhan na ini na an huri.
Enkaso padagos na napauktaba an eleksyon, nagpatanid si Zubiri na ini an posibleng magraot sa tiwala kan mga namamanwaan sa naabot na bunga kan katuninongan sa rehiyon.
Marurumduman, dapat kuta pigtalaan an BARMM elections ngunyan na March 31, 2026 alagad naghurot an Comelec nin dugang na panahon kan preparasyon.
Basado sa konsultasyon sa Comelec, bangsamoro transition authority (BTA) asin iba pang stakeholders, an petsang September 2026 na an pinakaamay asin pinaka-praktikal na petsa tanganing masierto na marhay an preparasyon kabali na an redrawing kan precinct maps, voter registration asin pagpaparehistro kan mga partylist asin sektor.
