NAGA CITY- Naka-full alert status an Bureau of Fire Protection Bicol ngunyan na holiday season tanganing masierto na an gabos na fire stations an tolos na makapagresponde sa insidente kan kasulo.
Sigun ki Fire Senior Superintendent Achilles Santiago, acting director kan BFP-5, an nasambitan ng alert status an pigpautob puon pa kan nakalihis na December 5 asin madurar hasta January 15, 2026.
Sigun sa opisyal, nakapag-deploy na sinda kan nasa 2,471 personnel sa rehiyon na igwang bitbit na firefighting equipment asin lunadan na naka- standby, kabali an nasa 258 fire trucks, 48 ambulances, asin 11 rescue vehicles.
An mga personahe gikan sa BFP an pig-designar sa mga malls asin public areas kun saen matinir an mga ining naka- duty hasta Jan. 15 sa masunod na taon.
Dugang pa digde, an mga ambulansiya an stratehikong naka prepositioned enkaso igwang magbungkaras na emerhensiya. Pigpaliwanag pa ni Santiago na an mga fire stations asin sub-stations sa bilog na Rehiyon an susuportaran kan nasa 3,000 community fire auxiliary brigades na pig-activate kan local barangays.
An nasambitan ng brigades an pigpreparar kan community fire protection plans.
Mientrastanto, pigsaysay ni Santigao na kaipuhan an alerto nin huli ta naggagamit an mga tawo nin paputok sa pagselebrar kan pasko asin bagong taon.
An paggamit kan paputok an sarong contributors kan mga kasulo ngunyan na holiday season.
Sa ngunyan, hagad na sana kaini an pakikipagtabangan kan publiko para sa mas salbadong komunidad ngunyan na pasko asin bagong taon.
