NAGA CITY- Padagos na nangangapudan an state weather agency sa may parte kan Pili, Camarines Sur sa publiko na magpreparar asin padagos na magmonitor sa pigbabantayan na Bagyong Uwan.
Sa entrevista kan Bombo Radyo Naga ki Ian Neil Nuñez, Officer in Charge kan CBSUA Pili-Agromet Station, sinasaysay kaini na makusog na marhay an bagyo kun saen naghihiro ini 35 kilometers per hour sulnupan asinm piglalaoman na magigin super typhoon antes na mag-landfall sa Central Luzon partikular sa Southern Isabela o Northern Aurora kun dae mabago an hiro.
Sigun pa ki Nuñez, mahewason an sakop kan bagyo sa bilog na Pilipinas kun saen maikukumparar sa motorsiklo an duros na taglay kan Bagyong Uwan. Dugang pa ni Nuñez, susog sa 12 hours forecast kan state weather agency nasa atyan na bangi nasa 475 km Sirangan na ini kan catanduanes asin sa aga aldaw nin Domingo yaon na ini sa Daet.
Apwera digde, an eyewall makakaeksperyensiya nin makusog na duros kaya padagos na pigpapalikay an mga tawo.
Mientrastanto, padagos man na pigtawan duon kan opisyal na dae pag-ipasipara an nasambitan ng bagyo partikular sa Partido area huli ta laog pa ini sa cone of uncertainty.
Kun enkaso man na dae magbaba atyan na alas 8 an bagyo, parehas na track pa man an tatahakon kaini.
Siringman nagpatanid man si Nuñez sa publiko na laoman an storm surge asin pagbaha orog huli sa bagyo. Sa ngunyan, pigsaysay man kan opisyal na may saro pang pigbabantayan na raot kan panahon alagad dae pa nahihiling na magin dagusang bagyo.
