Nagsangat an dating Presidente kan Estados Unidos na si Joe Biden nin kaso laban sa Departament of Justice (DOJ) kan US tanganing harangan an planong pagpaluwas kaini nin mga audio recording asin transcript kan saiyang pribadong mga pakikipag-olay sa saiyang biograpo kan 2016 asin 2017.
Susog sa reklamo na isinangat sa korte federal sa Washington, D.C., an DOJ nakaiskedyul na iluwas an mga materyales sa U.S. House Judiciary Committee asin sa konserbatibong grupo na Heritage Foundation sa Hunyo 15.
An grupo naghagad kan mga dokumento bilang parte kan impormasyon na ginamit sa sarong imbestigasyon kan dating Espesyal na Abogado na si Robert Hur kan 2023 sa pag-asikaso ni Biden kan mga sekretong dokumento.
An kaso nagsasabi na an proseso nin kahagadan kan komite inaabuso tanganing malikayan an mga probisyon kan Freedom of Information Act na naglilimit sa pagpaluwas kan siring na impormasyon.
An kampo ni Biden naghahagad sa korte na ideklara an kahagadan kan komite na ”not valid” asin “pretextual” asin lubos na harangan an pagpaluwas kan mga rekording.
Mientrastanto, sinabi kan sarong tagapagtaram kan DOJ na mawot kan ahensya na iluwas an mga recordings ngani na mahiling kan publiko an content kaini, na suboot nagpapahiling kan mental state kan dating presidente.
An kampo ni Biden marigon na pinagnegaran an mga alegasyon, na nagsasabi na an mga rekording itinao sa kondisyon na dai ini iluwas sa publiko.
Susog ki TJ Ducklo, an tagapagtaram ni Biden, an dating presidente nakipagtabangan sa imbestigasyon ni Hur, na nag-iinsistir na ini bako sanang bagay nin transparency kundi pati na nin politika.
Aram na an mga rekording parte kan proseso nin pagsurat kan memoir ni Biden na “Promise Me, Dad,” na nagtutukar kan saiyang buhay mantang an saiyang aking si Beau Biden nakikipaglaban sa kanser sa hutok.
An korte dati nang tinugutan si Biden na mag-interbenir sa kaso kan Heritage Foundation laban sa DOJ, alagad dai siya tinugutan na kwestyonon an kahagadan kan U.S. House Judiciary Committee.
