Kabali sa mga bagong lisensyadong doktor sa nasyon an tubong Bato, Camarines Sur kun sain siya an pinakaenot na doktor sa saiyang pamilya.
Sa intrevista kan Bombo Radyo Naga kay Dr. Alexa Shellie Duron Gerobin – 2026 Physician Licensure Examination Passer, ipighayag kaini an mga inaatubang kaining agnat mantang nag-aadal nin medisina, kabali na an sunod-sunod na eksaminasyon, kawaran nin turog, pagal, asin mahigot na preparasyon para sa licensure examination.
Ilinadawan niya an Biochemistry bilang saro sa pinakamasakit na asignatura sa medisina huli sa importanteng papel kaini sa pagsabot kan mga proseso kan hawak asin an pag’uswag kan manlaen-laen na helang.
Dakula man an nagin papel kan suporta kan saiyang pamilya sa saiyang pag-andam para sa eksaminasyon. Nagkondusir siya nin online review sa harong, mantang padagos na nareresibe an suporta asin pag-enkaminar kan saiyang mga mahal sa buhay.
Apwera sa pagpasar sa eksaminasyon sa lisensya, si Dr. Guerobin parte man kan programa kan Doctors for the Country Scholars. Segun saiya, kabale sinda sa enot na batch kan iskolar kan programa sa Bicol University asin naghahalat na nin dugang na instruksyon hali sa Commission on Higher Education (CHED) asin Department of Health (DOH) dapit sa saindang maabot na assignment sa mga komunidad.
Pigtawan-duon man ni Dr. Guerobin na bako sanang natural na talento an kaipuhan tanganing maging doktor, kundi disiplina, tiyaga, pagtubod sa Diyos, asin suporta hale sa mga tawong nagtutubod sa kakayahan kan sarong indibidwal.
Nangapudan ini sa mga nagngangaturugan na magin doktor na dae matakot na magprobar asin dae mawaran nin buot sa ibong kan angat sa saindang pag-adal.
Segun saiya, padagos an responsibilidad kan sarong doktor maski tapos na an Licensure Examination, huli importante an padagos na edukasyon tanganing maseguro an pagtao nin de kalidad na serbisyo medical sa mga pasyente.
Nagpahayag man siya nin pasasalamat sa saiyang pamilya, mga magurang, mga amigo, mga katrabaho, mga dating katrabaho, mga propesor, asin gabos na nagtiwala asin nangadyi para sa saiyang trayumpo
