Ipinahayag kan PSA USec. Dennis Mapa na ini katumbas kan mga 2.58 milyones na Pilipino na daing trabaho. Mas halangkaw ini sa 3.9% kan Marso kan nakaaging taon, alagad medyo mas hababa sa lebel na nairehistro kan Pebrero.
Mientrastanto, an bilang kan mga kulang sa trabaho o an mga naghahanap nin dagdag na kita yaon sa 12.3%, o pigkakarkulong 6.03 -M katawo.
Bilang simbag, an Departament of Economy, Pagplano asin Pag-uswag nagsabi na an gobyerno mag-iimplementar nin mga lakdang tanganing mapreserbar an mga trabaho asin mapakusog an proteksyon sosyal, job-skills matching, asin mga programa sa reskilling, orog na para sa mga apektado kan mga tensyon sa Middle East.
Segun ki DEPDev Secretary Arsenio Balisacan, papakusugon kan gobyerno an pagtao nin ayuda arog kan fuel subsidy asin suporta sa mga trabahador sa transportasyon, paraoma, asin parasira. Gagamiton man an mga digital platform arog kan e-wallet nganing maparikas an distribusyon kan ayuda.
Katakod kaini, inasegurar kan gobyerno an padagos na suporta sa mga overseas Filipino workers na apektado kan krisis sa Middle East, kabali na an livelihood programs, training, asin financial assistance.
Sa kabilogan, an employment rate nagdanay na halangkaw sa 95%, na igwang total na 49.07 milyon na Pilipino an nagtatrabaho. An sektor nin serbisyo nangengenot pa man giraray bilang pinakadakulang among, na sinusundan kan agrikultura asin industriya.
