Tinanggal na kan Bureau of Internal Revenue (BIR) an Value-Added Tax (VAT) sa allowable system loss charge kan mga kuryente, segun yan sa Revenue Memorandum Circular (RMC) No. 97-2026 na ipinaluwas ngunyan na Nobyembre 14, 2026 sa irarom kan pamamayo ni Commissioner Charlito Martin R. Mendoza.
Sa irarom kan nasabing circular na nagpapatupad kan ERC Resolution No. 26, Series of 2026, idineklara an allowable system loss charge bilang sarong government-mandated pass-through cost na dai na ibabali sa gross sales para sa VAT computation, kun kaya dai na ini papatawan nin output VAT asin creditable withholding sa VAT.
Segun ki Commissioner Mendoza, an lakdang na ini alinsunod kan pagboot ni Pangulong Ferdinand R. Marcos Jr. asin Finance Secretary Frederick Go na magpatupad nin mga praktikal na solusyon tanganing maibsan an pasanon kan mga namamanwaan sa halangkaw na presyo kan mga barakalon asin singil sa kuryente.
Paliwanag kan BIR, tanganing magin prayoridad an transparency, kinakaipuhan na suwayon asin malinaw na ipahiling an allowable system loss charge sa mga billing statement asin invoice kan mga generation companies, National Grid Corporation of the Philippines (NGCP), distribution utilities, asin mga electric cooperatives.
Pigsierto kan pamayyhan kan BIR na bagama’t dai kaini masosolusyunan an bilog na problema sa halangkaw na singil sa kuryente, an lambang pisong maibabawas sa resibo kan mga consumer sarong dakulang tabang sa pang-aroaldaw na gastos kan lambang pamilyang Pilipino.
