Paramientras pinundo kan Senate Impeachment Court an opisyal na livestreaming kan impeachment trial ni Vice President Sara Duterte ngunyan na Biyernes, Oktubre 9, matapos magpahayag nin paghadit an testigong si Bureau of Internal Revenue (BIR) Chief of Staff Atty. Anne Loraine Garcia-Marquez manungod sa privacy kan nagkapirang opisyal kan ahensya.
Nagpoon an paghadit ni Garcia-Marquez kan maipahiling asin ma-flash sa mga monitor asin screen sa laog kan impeachment court an mga sensitibong personal na detalye kan mga revenue officer asin examiner kan BIR na nagkakapot kan mga dokumento nin pagsusuri.
Huli kaini, tulos na ipinagboot kan impeachment court an pagpundo kan broadcast tanganing masuri asin maiproseso an pagtatakop o pag-redact sa mga pribadong impormasyon susog sa Data Privacy Act asin mga probisyon kan Tax Code manungod sa confidentiality.
Nagpoon magtestigo si Garcia-Marquez sa ikaduwang aldaw kan saiyang pag-atubang sa korte manungod sa Article 2 kan impeachment complaint na nagtutukoy sa sinasabing unexplained wealth asin mga income tax return (ITR) ni VP Sara asin kan saiyang agom na si Atty. Manases “Mans” Carpio.
Ipinapadagos kan Senado an pagdangog mantang inaareglo an seguridad kan mga ipinapahiling na electronic exhibit tanganing masiguro na dai malalabag an karapatan sa data privacy kan mga pampublikong kawani mantang nagpapadagos an pampublikong paglilitis.
