Posibleng bumaba sa 13 an bilang kan boto na kaipuhan para ma-convict si Bise Presidente Sara Duterte kun 20 senador sana an legal na makakapagpartisipar bilang senator-judges sa oras na magpaluwas nin hatol an Impeachment Court.
Ini an interpretasyon na iprinesentar kan abogado asin professor of Law na si Howard Calleja, base sa probisyon kan Konstitusyon na nangangaipo nin concurrence of two-thirds of all members of the Senate para sa conviction.
Segun ki Calleja, bakong nakapirmi sa 16 o 24 an bilang na gagamiton na basehan sa pagkuwenta kan two-thirds.
Imbes, posibleng magbago an denominator depende sa bilang kan mga senador na legal o aktuwal na makakaganap kan saindang katungdan bilang senator-judge.
Kun 21 senator-judges sana an makakaboto, sinabi niya na kaipuhan na tukuyon kun 13 o 14 an katumbas kan two-thirds.
Kun 20 man an makakapagboto, kinakarkulo kaini na 13 boto an kaipuhan para sa conviction.
Sigon ki Calleja, an voting threshold sarong “moving number” huli ta bakong tahasan na itinakda kan Konstitusyon an numerong 16 o 24.
Sa presente, nagdadanay sa 16 boto an conviction threshold base sa naenot na ruling kan presiding officer kan Impeachment Court, na iyo man an posisyon kan House prosecution.
Inimbitaran man kan Impeachment Court an mga dating mahistrado kan Supreme Court tanganing magtao nin opinyon sa interpretasyon kan constitutional requirement antes pag-ulayan kan mga senator-judge an disputed voting threshold.
An Impeachment Court an magdedesisyon kun papadanayon an 16-vote threshold o magamit nin ibang interpretasyon antes makaabot sa pinal na botohan an kaso laban sa bise presidente.
