Ipinahayag kan Philippine Institute of Volcanology and Seismology (PHIVOLCS) na posible pang magkaigwa nin panibagong pagsabog o explosive eruption an Bulkang Mayon sa Albay.
Segun ki PHIVOLCS Mayon Observatory Resident Volcanologist Doreen Abelinde, padagos na nagbuburo an nagkapirang parte kan bulkan base sa saindang huring pagsusuri.
Nakarekord man nin halangkaw na sulfur dioxide emission an kawanihan na malinaw na nagpapahiling kan presensya nin magma sa hababaw na parte kan Mayon.
Ipinaliwanag kan opisyal na bago an presenteng paghiro kan bulkan kaya dai ini lubos na matukoy gamit an mga instrumento asin kulang man sa mga senyales o precursor bago magsabog.
Idinugang pa ni Abelinde na an nangyaring effusive eruption kan nakaagi mas maluya kumpara sa explosive eruption na mas bayolente an idinudulot na pag-alburuto.
Huli sa panibagong aktibidad na ini, itinaas na an antas kan bulkan sa Alert Level 3 mantang ipinag-oobligar an paglikas kan mga residente sa laog kan 6-kilometer Permanent Danger Zone (PDZ).
Nagbabala man an mga awtoridad sa mga kataraid na komunidad manungod sa grabeng huma kan ashfall, rockfall events, asin mga peligroso na pyroclastic density currents o uson.
