Dae pighahale kan Philippine Institute of Volcanology and Seismology (Phivolcs) an posibilidad nin mas dakulang pagbuga nin abo asin asupre kan Mayon volcano sa masunod na mga aldaw.
Ini kasunod kan pagbuga kaini nin mahibog na aso ngunyan na aldaw, Nobyembre 3, na umabot sa 1,600 kms an langkaw.
Segun ki Dr. Paul Alanis, resident volcanologist kan Mt. Mayon Observatory, igwa pa man giraray nin mainit na magma sa laog kan bulkan na posibleng kawsa kan mga aso na iniluwas asin iluluwas pa kaini.
Minsan ngani mayo pang nahihiling na pagbulos nin lava, dai man giraray dapat balewalaon an posibilidad nin mas makusog na pagsabog sa maabot na panahon.
Naglaba nin duwang minuto an nairehistrong pagbuga nin abo kan 8:22 nin aga, saro sa mga dakulang pagluwas nin aso na naitala kan Phivolcs.
Natunton kan mga eksperto an pagpadpad kan mahibog na aso pasiring sa Guinobatan, Daraga, asin Camalig, sa probinsya kan Albay.
Liwat na pinagiromdom ni Dr. Alanis an estriktong pagpugol sa paglaog sa laog kan 6-KM permanent danger zone huli sa peligro na dara kan bulkan, ano man na oras.
