NAGA CITY- Pigbabasol ngonyan kan Department of Social Welfare and Development (DSWD) Bicol an mga bus companies katakod kan kilo-kilometrong stranded vehicles sa probinsya nin Sorsogon tuyong igwa nin nag-aabot na kalamidad.
Ini sa ibong suboot kan amay na abiso hale sa Land Transportation and Franchising Regulatory Board (LTFRB) na nagpapangalad sa pagbiyahe pasiring sa nasambitang mga lugar huli sa raot nin panahon na dara kan bagyong Urduja.
Sa entrevista kan Bombo Radyo Naga ki Arnel Gacia, regional director kan DSWD Bicol, sinaysay kaining sa Maynila pa sana nagtatao na nin abiso an mga otoridad na dae na pwedeng makalaog sa nasambitang probinsya alagad napag-araman suboot na paglaog sa Bicol, nagdidiretso pa an mga bus pasiring sa Tacloban asin Matnog.
Kun marurumduman, nag-abot sa haros apat na kilometro an pila kan mga na-standed na bihikulo sa Matnog Port na pigbabasol man ngonyan kan LTFRB sa mga bus companies.
Sa ngonyan, hagad ni Garcia na magkaigwa nin ordinansa para malikayan na an siring na pagbalgar sa abiso kan mga otoridad.
