NAGA CITY – Nairehistro sa Camarines Sur an pinakahalangkaw na inflation rate sa bilog na Bicol Region kan bulan nin Hunyo 2024.
Sa nagin patara-tara ni Raul Aspe Jr., Officer in Charge kan PSA Camarines Sur, pigsaysay kaini na an headline inflation o an paglangkaw sa mga presyo kan produkto asin serbisyo sa nasambitan ng probinsya an nagrekas sa 5.5% kan nakalihis na bulan.
Mantang kan Mayo, 2024 nairehistro an inflation sa 3.4% asin 5.0% kan Hunyo, 2023. Mapakol man sa 3.9% an average inflation puon Enero hasta Hunyo sa presenteng taon.
An pangenot na karasonan kan nasambitan ng paglangkaw kan bulan nin Hunyo kesa sa Mayo an huli sa mas marekas na paglangkaw kan presyo nin housing, water, electricity, gas asin iba pang fuels na nagkurit nin 0.9% inflation asin 51.0% share sa paglangkaw kan panggabos nin inflation sa bilog na probinsya.
An pangenot man na kawsa kan paglangkaw sa presyo kan mga nasambitan ng produkto an huli sa marekas na paglangkaw sa presyo kan kuryente na igwa nin -3.0% inflation gikan sa -30.9% inflation kan bulan nin Mayo.
Nakaambag man sa paglangkaw sa paglangkaw kan nasambitan ng produkto an mas marekas na paglangkaw kan presyo nin LPG na igwa nin 16.7% inflation asin kerosene na igwa nin 9.6% inflation.
Apwera pa digdi, naglangkaw man an inflation kan Hunyo kesa Mayo huli sa marekas na paglangkaw kan presyo nin Food and non-alcoholic beveranges sa 8.0%, na igwa nin 46.8% share sa pangkagabosang paglangkaw nin inflation sa Camarines Sur.
Nagresulta man ini huli sa paglangkaw kan presyohan sa vegetables, tubers asin iba pa na igwa nin -1.5% inflation, fish and other seafood na may 1.2% inflation, asin meat and other na igwa nin 74.7% inflation.
Ikatolong karasonan an marekas na paglangkaw kan presyohan sa clothing and footware na may 9.7% inflation asin 1.5% share. Nag-ambag digdi an paglangkaw kan presyo nin garments na igwa nin 12.9% inflation gikan sa 11.6% inflation kan Mayo, 2024.
Pag-abot man sa overall inflation kan Hunyo, an pangenot na commudity group na nag-ambag digdi an Food and non-alcoholic beveranges na igwa nin 8.0% inflation asin 66.4% share.
Huli digdi, nairehistro an pinakahalangkaw na inflation rate sa probinsya kan Camarines Sur sa bilog na rehiyong Bicol na nagpakol sa 5.5% inflation gikan sa 3.4% kan Mayo, 2024. Mantang ikurit man an pinakahababang inflation sa rehiyon an sa Sorsogon na igwa nin 2.2% gikan sa 2.8% inflation kan Mayo 2024.
