Pig-anunsyar kan Toll Regulatory Board (TRB) na ibebweltada na an cashless asin contactless toll collection puon sa Marso 15.

Sigun sa TRB, an mga naggagamit kan toll expressway an dapat na igwang valid Electronic Toll Collection (ETC) device o Radio Frequency Identification (RFID) sticker na naka-install sa saindang mga lunadan.

Mantang an mga lunadan na mayong RFID stickers an tutugotan na makalaog sa toll plazas kun saen ibubugtak an nasambitan device.

Pigpapagiromdom man kan TRB na alagad maski tutugotan na makaagi sa toll plazas, an mga motor vehicles na mayong valid RFIDs an iisyuhan nin Temporary Operator’s Permit o Show Cause Order para sa pagbalgar sa No valid Electronic Toll Collection Device, No Entry Policy.

Pigpaliwanag man kan TRB na an nasambitan ng polisiya an obhetong maparekas an pagbabayad kan toll fee huli sa kadalasan soboot congested o suksokan asin halaba an pila sa mga lane na piggagamit kan mga nagbabayad na motorista asin nakakasagabal sa marekas asin episyenteng bulos kan trapiko pasiring sa mga pigtalagang lane para sa Electronic Toll Collection.

Marurumduman na pigsuspinder an nasambitan ng cashless policy kan nakalihis na Setyembre kan nakalihis na taon huli sa technical issues asin tanganing matawan nin panahon an publiko na matuod sa paggamit kan contactless payments.