Padagos na nakakaeksperyensiya an mga konsumidores kan Camarines Sur II Electric Cooperative (CASURECO II) nin nagkapirang non- schedule power interruptions orog na huli sa paglangkaw kan pangangaipo sa kuryente ngunyan na tag-init.
Sa intrevista kan Bombo Radyo Naga ki Rinner Bucay, CASURECO II Spokesperson, uminabot na sa 70 hasta 80% an load capacity kan saindang mga power substation, asin may pagkakataon na minaabot pa ngani ini sa 90%, lalo na sa peak load hours.
Paliwanag ni Bucay, sa panahon nin tag-init, piglalaoman na madugangan an konsumo nin kuryente huli sa labing init kan panahon. Huli kaini, apektadong marhay an mga pasilidad arog kan mga transformer, linya nin kuryente, asin iba pang kagamitan sa kuryente, na nagigin kawsa nin sobrang init asin posibleng danyos.
Idinagdag pa ninda na an siring na mga sitwasyon nagreresulta sa biglaan na pagkaputol nin kuryente, partikularmente sa nagkapirang residensyal na lugar na may problema sa koneksyon nin kuryente. Sa ibong kaini, pigduon kan kooperatiba na normal na pangyayari ini sa panahon nin tig-init base sa saindang monitoring kan mga nakalihis na taon.
Tanganing masimbagan ini, an CASURECO II nagkokondusir nin preventive maintenance asin kinakaipuhan na adjustment sa saindang mga pasilidad. Igwa man nin mga nakaiskedyul na mga power-interruptions tanganing magibo an mga paghirahay, mantang an mga dai nakaiskedyul na power-interruptions tulos na inaatubang kun may naeksperyensahan arog kan sobrang init o naraot na mga linya asin kagamitan.
Pig-eenkaminar man an mga konsumidor na magin vigilante asin tulos na ireport an anuman na senyales nin problema arog kan sparking, nagkakalayong mga linya, o mga putol na transformer para maibitaran an posibleng mas seryosong mga depekto.
Apwera kan epekto sa supply nin kuryente, nagpapatanid man an kooperatiba na posibleng magkaigwa nin domino effect an halangkaw na konsumo, kabale na an posibleng paglangkaw kan presyo kan kuryente kun kulang an supply sa mas mahiwas na grid.
Katakod kaini, nangangapudan an CASURECO II sa publiko na mag-conserve asin magamit nin episyente an kuryente tanganing mamantenir o mabawasan an saindang konsumo, orog na sa tahaw kan padagos na paglangkaw kan pangangaipo.
Sa ibong kaini, pigsierto kan kooperatiba na nagdadanay na halos 24/7 an saindang operasyon para tulos na magresponde sa mga malfunction. Padagos man an saindang pigbabantayan na sitwasyon, kabali na an posibilidad na magkaigwa nin yellow asin red alerts sa Luzon grid na posibleng magin kawsa kan rotational brownouts.
Sa ngunyan, mantenidong bastante an suplay nin kuryente, alagad aminado an CASURECO II na mas halangkaw an konsumo ngunyan na bulan nin Abril, orog na puon udto sagkod banggi kun sain nairehistro an pinakahalangkaw na pangangaipo.
Padagos an pangapudan sa publiko na magin preparado asin makikooperar sa pagtipid nin enerhiya tanganing maibitaran an mas grabeng epekto sa supply asin gastos kan kuryente sa mga masunod na aldaw.
