Nagtutubod an duwang co-chairs kan House Quad Committee na si Cassandra Ong, an authorized representative kan Lucky South 99, ay isang business “dummy.”
Pigtanggi ni Ong an pagigin “dummy” sa Quad Comm hearing kan Miyerkules, asin sinabing saro sana ining investor sa Whirlwind, an real estate company na nagpaupa kan property kaini sa illegal POGO hub kan Lucky South 99 sa Porac, Pampanga.
Alagad sinaysay ni House Committee on Dangerous Drugs Chairperson and Surigao del Norte 2nd District Rep. Robert Ace Barbers na malabo an source of funding ni Ong para sa saiya soboot na investments.
Sigun ki Barbers, baka gikan sa ilusyon ni Ong an funds kaini orog na ta igwa ini nin dakul na pondo. Apwera pa digdi, an edad soboot ni Ong an nasa 24, 25-anyos. Kun saen, an pagkakaigwa kan siring na pondo tanganing mag-operar nin real estate project sa Pampanga, an makaduda.
Mientrastanto, arog man kaini an pagtubod ni House Committee on Public Order and Safety Chairperson and Santa Rosa City Rep. Dan Fernandez. Soboot, mamamatean na si Ong an sarong dummy, kun an kwartang nag-aagi sa saiya an milyun-milyon, ginatos na milyon.
Sa ibong na lado, balik-normal na an lebel kan blood pressure ni Ong makalihis ma-admit sa sarong ospital kan Miyerkules, kan magbaba an saiyang blood pressure sa kasagsagan kan quad comm hearing.
