Namatean kan Cleveland Cavaliers an pinakamatinding pagkadaog ngunyan na season makalihis magbalos an dati kaining dinaog na Oklahoma City Thunder (OKC), 134 – 114.
Mistulang ibinunton kan OKC an anggot kaini puon sa dating namate na pagkadaog kan nakalihis na huring naghampangan an duwang NBA best team kun saen sa pagtatapos pa sana kan enot na quarter an kapot na kan Thunder an 17 points na kalamangan.
Dinugangan pa kaini sa ika-duwang quarter na pina-aboy sa 25 points.Pinirit man kan Cavs na magbalos sa ika-tolong quarter alagad dae pa man kaini kinaya an episyenteng opensa kan best Western team.
Imbes na mahabol, orog sanang naglangkaw an lead asin nag-abot pa sa 37 points.Sa laog sana kan 29 mins an nagibo ni Shai Gilgeous-Alexander na maglaog nin 40 points, kaibahan an walong assists.
Nag-ambag man an forward kan koponan na si Luguentz Dort nin 22 points sa laog sana nin 20 mins na pagkakawat. Mayong nagibo an limang CAVS starter sa mistulang pag-masaker kan Oklahoma sa mga ini.
Magin an sharpshooter na si Donovan Mitchell an nalimitaran sana sa walong puntos sa laog ka 21 mins na pagkakawat.
Sulamenteng si Darius Garland an naggibo kan episyenteng opensa gikan sa Cavs kun saen sa laog kan 24 mins na pagkakawat an nagibo kaining magpalaog nin 20 ponts, kaibahan an siyam na assists.
Kasunod kan nasambitan ng laban, kapot ngunyan kan duwang koponan an 34-6 na win-loss recors na kapwa best record sa presenteng season.
