Nagsunad si Palawan 2nd District Representative Jose Chaves Alvarez, na iyo man an Chairperson kan House Committee on Energy, nin House Resolution No. 1249 tanganing pormal na imbestigaran, an Aid of Legislation, an System Loss Charges sa singil sa kuryente.
Obheto kan resolusyon iyo an surihon kun patas, malinaw, asin may sapat na proteksyon an mga consumer laban sa naturang bayarin.
Sa inquiry, aaramon kun pano kinukuwenta an System Loss, sisiertuhon an Transparency, asin hahalaton man kun napapangatamanan an kapakanan kan publiko.
Plano kan komite na hilingon an isyu bago dagusan na amyendaran o halion an system loss charges sa mga nakabinbin na panukalang batas sa Kamara. Tanganing madangog an gabos na panig asin malinawan an publiko, plano kan Kamara na ipaapod an Energy Regulatory Commission (ERC), an Transmission Provider, asin an mga Distribution Utilities, kabilang an mga korporasyon asin kooperatiba kan kuryente na nagsusuplay sa mga harong.
Kaiba man an mga grupo na nagrerepresentar sa ordinaryong namamanwaan tanganing maipahayag an saindang mga reklamo. Segun sa pahayag kan House of Representatives Press and Public Affairs Bureau, duwang pangenot na rason an nagtutulod na napapanahon an lakdang na ini.
Kadakol na consumer an dai naiintiendihan kun ano talaga an System Loss Charge, asin lalo pang pinapalala ini kan magkakasalungat na impormasyon sa social media. An imbestigasyon kasunod kan direktiba ni Presidente Ferdinand Marcos Jr. sa saiyang ikalimang State of the Nation Address (SONA) na pag-adalan an pagtanggal kan System loss Charges tanganing mapababa an bulanang bayad sa kuryente kan mga Pilipino.
