Tinugutan kan Energy Regulatory Commission (ERC) an Meralco na maningil nin kabuuang P8.7 billion puon sa mga consumer kaini makalihis masuri an over-recoveries asin under-recoveries an pass-through charges puon 2011 hanggang 2022.
Segun sa ERC, pwedeng kolektahon kan Meralco an P8.71 billion sa laog kan 36 na bulan, makalihis ibawas an halagang naibalik na o nasingil sa mga customer kaini sa nakalihis na mga taon.
An pass-through charges ay mga bayadang kinokolekta lamang kan Meralco para sa iba pang ahensya asin kumpanya, siring kan transmission charges, buwis, asin iba pang singilon.
Nilinaw kan ERC na mayong kinikita an Meralco hali igdi.
Pig isplikar man kan komisyon na nagsasagibo nin “true-up” an distribution utility nganing maitugma an aktwal na gastos sa kantidad na nakolekta puon sa mga consumer.
Segun sa pagsusuri kan ERC, may pirang singilon na sobra an nakolekta kan Meralco, kaya dapat ining ibalik sa mga customer. Kabali digdi an lifeline subsidy, senior citizen discount subsidy, asin local franchise tax.
Segun paman, mas dakula an under-recovery o kulang na nakolekta kan Meralco sa generation cost, transmission cost, system loss, asin real property tax, na umabot sa lagpas P8.7 billion.
Kabali digdi an P7.3 billion para sa generation cost, na katumbas kan P0.07 kada kilowatt-hour na sisingilon sa mga customer.
Nainot nang isugo kan ERC an P9.5-billion refund kan Meralco sa mga consumer. Alagad huli sa bagong kasuguan, mababawasan an aktwal na halaga kan refund na marereseba kan mga customer.
