NAGA CITY- Pigkundusir ngunyan na aldaw, Agosto 5, 2024 an Change of Command Ceremony kan 9TH Infantry Division Philippine Army sa banwaan nin Pili, Camarines Sur.
Sa entrevista kan Bombo Radyo Naga ki Major Frank Roldan, tagapagtaram asin Head Division kan Public Affairs Office, sinaysay kaini na nag-abot na sa mandatory age of retirement an Commander kan 9th Infantry Division, Philippine Army na si Major General Adonis Bajao asin pigribayan ini ni Major General Noe Alberto Q. Peñafiel komo ika-18 Komandante kan saindang hanay.
Pinangenotan an seremonya ni Lieutenant General Roy Galido, Commanding General kan Philippine Army.
Sarong miyembro kan PMA “Sambisig” Class of 1991, si Peñafiel na dati man na nagserbe komo Internal Auditor kan General Headquarters kan Armed Forces of the Philippines asin nagkapot kan iba pang importanteng posisyon sa militar.
Dae naman bago si Peñafiel sa Bicol Region, nin huli ta dati naman ini na nagserbe komo Commander kan 903rd Infantry “Patriot” Brigade puon 2020 hasta 2021.
Sa saiyang patara-tara, pig-omaw man ni Major General Peñafiel si Major General Bajao sa saiyang maka-Diyos na pamamaya sin mga trayumpo na naabot kan 9ID.
Nagpromesa man an opisyal na ipapadagos kaini an mga magagayon na napuonan ni Major General Bajao orog na an pagsimbag sa insurhensiya sa nasyon.
