Pigtalaga kan Phoenix Fuel Masters si Charles Tiu komo saindang bagong head coacg, hudyat kan panibagong yugto para sa prangkisa, alagad an mentor kan College of Saint Benilde dae pa mahali sa Taft Avenue.
Opisyal na pig-anunsiyar kan Phoenix an lakdang kan Martes nin hapon, kun saen riribayan ni Tiu an dating posisyon na kapot ni Willy Wilson.
Si Tiu an presenteng head coach man kan Benilde Blazers. Komo dating lead deputy kan Converge FiberXers, naihatod kaini an koponan sa duwang NCAA men’s basketball Finals appearances asin apat na Final Four stints sa laog kan limang season puon 2022 hasta 2025.
Sa ibong kan saiyang pagbubweltada sa PBA, ngunyan komo head coach, duon ni Tiu na dae kaini babayaan an Saint Benilde.
Ipigbabawal kan mga patakaran kan PBA asin NCAA an mga head coach na magkapot nin parehong posisyon sa ibang liga, buot sabihon dae ini pupwedeng magtinir komo mentor kan Blazers makalihis an saiyang appointment sa Phoenix.
Siring man, duon kaining matinir ini sa Saint Benilde mantang nagpepreparar para sa Season 102 ngunyan na taon.
Gikan sinda Tiu asin an Blazers sa sarong Final Four appearance sa Season 101, alagad bigo sindang makabweltada sa Finals makalihis madaog sa San Beda University sa laog kan tolong kawar sa semifinals.
Sa ngunyan ini man an may trabaho na pangenutan an Fuel Masters pabalik sa PBA Playoffs, makalihis huring makalaog an Phoenix sa postseason kan Season 48 Commissioner’s Cup semifinals, kun saen nadaog sinda sa Magnolia Hotshots sa apat na kawat.
