NAGA CITY- Puspusan soboot an preparasyon na pigsasagibo kan CBSUA-Sipocot partikularmente an mga estudyante na masabak sa chess competition para sa ikukundusir na State Colleges and Universities Athletic Association 2025.
Sa entrevista kan Bombo Radyo Naga ki Assistant Professor Sherwin Baja, University Coach For Chess Coordinator/ International Relations office CBSUA-Sipocot, sinaysay kaini na antes pa an nasambitan ng kompetisyon nagsairarom an mga players sa practice, simulation asin analysis game.
Obheto kaini na mas linangon pa an kakayanan asin talento kan mga estudyante na nagkakawat nin chess.
Sigun pa ki Baja, maikokonsederar na inborn na soboot an mga nagkakawat nin chess, an ginigibo sana ninda pig-e-enhance an kakayanan kan mga ini tanganing maipaluwas an saindang kapasidad.
Dugang pa kan opisyal, may mga oras na pigtutukduan soboot an mga ini alagad igwa man pagkakataon na pigpapabayaan sa saindang mga diskarte nin huli ta nagtutubod sinda na kaipuhang pagkatiwalaan an desisyon kan mga players tanganing magin balanse.
Apwera digde, igwa man tactics na pigpreparar tanganing magin competitive an mga kaakian sa siisay man na saindang makakahampang.
Alagad an pinaka-importante na saindang padagos na pigpapagirumdom sa mga estudyante an pagsabuhay kan sporstmanship kun saen importante sa pagigin atleta o sarong indibidwal an pagkakaigwa nin respeto, disiplina sa saindang mga sadiri asin sa kapwa tawo.
Sa ngunyan, pig-enkaminar na sana kaini an mga chess player kan saindang eskwelahan na masabak sa kompetisyon na mag-enjoy asin magpangadyi para sa marhay na resulta.
