Inapod man kan Embahada kan China an pahayag ni Defense Secretary Gilbert Teodoro Jr. na “squid tactics” pagkatapos na akusaran kan sekretaryo an embahada na nag-aakto komo sarong public relations firm para sa negosyanteng Chinese na si Tony Yang, na sinasabing iyo an kagsadiri kan Sanjia Steel Corp. sa Misamis Oriental na sinalakay kan mga awtoridad.
Susog sa tagapagtaram kan Embahada kan China na si Ji Lingpeng, imbes na simbagon an mga kahaputan na ipighahapot sa sainda, si Teodoro soboot naggibo nin“baseless and sensational allegations” laban sa embahada.
Sinabi man kan embahada na dapat igalang ni Teodoro an rule of law asin an desisyon kan Department of Justice, na nagbasura kan mga kaso laban sa mga obrero na Intsik kan Sanjia Steel Corp. sa Misamis Oriental.
Alagad, nag-insistir si Teodoro na garo baga an Embahada kan China “nagla-lawyer” para ki Yang.
An mainit na pag-iriwal kan Embahada kan China asin kan hepe kan Depensa nag-ugat sa kaso kan mga Chinese National na inaresto sa sarong manufacturing plant sa Misamis Oriental.
Sa saiyang social media post, sinabi kan sekretaryo na dae dapat magtao nin legal advice an embahada huli ta segun saiya, miyembros sana kan Integrated Bar of the Philippines an pwedeng magtao kaini sa irarom kan existing laws.
Dugang pa ni Teodoro, an Embahada kan China bako sanang “PR” ni Tony Yang kundi garu abogado kaini.
Bilang simbag, inangat kan embahada si Teodoro na magprodusir nin ebidensya tanganing suportaran an saiyang mga alegasyon.
Nanindugan an Embahada kan China na obligasyon kaini na maseguro na an mga inosenteng trabahador na Intsik dai maaakusaran o mapadusahan na mayong supisyenteng basehan.
