Dakulang tabang sa mga paraoma, parasira asin sa sektor kan Agrikultura an pagkaigwa nin Cold Storage Facility sa banwaan nin San Jose, Camarines Sur.
Sa intrevista kan Bombo Radyo Naga kay Mayor Jerold Peña, kan Local Government Unit of San Jose, ipinaliwanag kaini na an proyekto kabtang kan mga inisyatibo na obheto na solusyonan an mga hamon na kinakaharap kan mga paraoma, partikular na sa pagbaligya asin pagdadara kan saindang mga produkto sa merkado.
Segun ki Peña, an ideya kan pagkaigwa nin arog kaining pasilidad nag-ugat sa Bicol Diversified Farming Expo na ginibo kan 2023, kun saen natalakay an mga pangangaipo asin problema kan mga para-oma.
Dugang pa niya, mahalaga na an mga kooperatiba asin an mismong mga parahuma an magmaneho kan pasilidad tanganing masigurong nagagamit ini nin tama asin direktang nakikinabang an mga benepisyaryo.
Ipinaliwanag man ni Peña na an papel kan lokal na gobyerno an makipag-ugnayan sa nasyonal na gobyerno tanganing maipatupad an mga programa asin magamit nin tama an mga pasilidad para sa kapakinabangan kan komunidad.
Pigtawan-duon ni Peña, na may Multi-Commodity Facility na pwedeng gamiton sa pagtipig kan mga gulay, asin pwede man gamiton para sa mga produkto kan livestock asin pangisdaan. Kaiba man sa mga pasilidad sa lugar an double-A slaughterhouse, kaya mahalaga an pagkaigwa nin cold storage facility para sa mga produkto kan hayop.
An mga inisyatibong ini obheto na mapauswag an pagmanehar kan mga produkto, mabawasan an pagkaraot kaini, asin mapakusog an kabuhayan kan mga paraoma asin iba pang nakasarig sa sektor kan Agrikultura.
