Pinapahiwas kan Commission on Elections (COMELEC) Naga an saindang information drive sa publiko sa paagi nin infographics asin voter education campaigns bilang preparasyon sa plebisito sa maabot na Nobyembre 21, 2026, dapit sa proponidong Highly Urbanized City kan Ciudad nin Naga.
Sa intrevista kan Bombo Radyo Naga ki Atty. Maico Julia – Election Officer III, COMELEC—Naga, sinabi kaini na katuyuhan kan information drive na maipaaram sa mga botante an mga importanteng detalye kan plebisito, kabale na an schedule, proseso kan pagboto, asin posibleng epekto kan pagigin sarong highly urbanized city. An panahon nin kampanya asin edukasyon sa mga botante sa mga barangay kan ciudad nakatalaan poon Oktubre 19 sagkod Nobyembre 19.
Sinabi ni Julia na an mga senior citizens asin mga (PWDs) pwedeng magboto poon alas 5 nin aga sagkod alas 7 nin aga, mantang an regular na oras nin pagboto poon alas 7 nin aga sagkod alas 3 nin hapon. Inenkaminar man niya an mga botante na makanuod nin orog pa manungod sa plebisito tanganing sinda makagibo nin may kaaraman na desisyon.
An COMELEC Naga mabugtak nin mga tarpaulin sa mga barangay hall, eskwelahan, asin iba pang pampublikong lugar. Makikipagtabangan man an COMELEC sa mga lokal na gobyerno asin sa media tanganing orog pang maiimpormaran an mga residentes.
Tinawang-duon ni Julia na magdadanay na neutral an COMELEC sa kampanya asin primerong papel kaini iyo an maseguro na magin maray an pagkondusir kan plebisito asin ma-engganyar an mga botante na magpartisipar. Hinagad niya sa mga kwalipikadong botante kan Ciudad nin Naga na magboto nin “Yes” o “No” sa Nobyembre 21, 2026, tanganing ipahayag an saindang desisyon sa propwesto kan siyudad na magin sarong Ciudad na may halangkaw na urbanisasyon.
