NAGA CITY – Nakisumaro an Comelec Naga sa pigkundusir na National ACM Roadshow kasuudma, Disyembre 2, 2024 sa siyudad nin Naga.
An nasambitan ng aktibidad an pigkundusir sa bilog na nasyon tanganing i-demonstrate an gagamiton na machine sa maabot na 2025 elections.
Obheto kaini na purbaran an transmission sa manlaen-laen na lugar sa nasyon siringman sa overseas sa pag-transmit kan mga boto puon sa paglaog sa Automated Counting Machine hasta sa makaabot ini sa National Board of Canvassers.
Sa entrevista kan Bombo Radyo Naga ki Felix Chavez, participant sa nasambotan ng aktibidad asin miyembro kan PWDs sa Naga City, pigsaysay kaini na an nasambitan ng roadshow an dakulang tabang para sa mga kaparehas kaining visually impaired individuals huli ta personal kaining naeksperyensuyahan an dakulang ginhawa na dara kan bagong Automated Counting Machines sa maabot na 2025 National and Local Elections.
Igwa soboot kaya na headset na nakatagama pa sa sainda tanganing maaraman kan mga visually impaired individuals na tama an saindang ibinoto.
Sa paagi pa kaini, maaaraman ninda kun ano an saiyang mga pigsaysay sa asistor an mismong saiyang naiboto.
Dugang pa ni Chavez, kadakol magagayon na pagbabago an dara kan bagong ACM huli ta igwa ining feature na makakatabang tanganing malikayan an darayaan.
Sa ngunyan, hagad na sana kaini na magdagos-dagos an magayon na inobasyon na ginibo kan Comelec nin huli ta sa paagi kan siring na sistema makaka-enkaminar pa ini nin mga persons with dissability asin mga visually impaired individuals na mag participate o magin parte ngunyan na Election 2025.
Saro soboot kaya ini sa magayon na pagkakataon para sa sainda tanganing magkaigwa nin boses dapit sa mga mawot na leader na magtukaw sa gobierno.
