NAGA CITY- Nagpagirumdom an sarong opisyalan kan COMELEC sa Sipocot, Camarines Sur dapit sa maabot na deadline kan Voters Registration.
Sa entrevista kan Bombo Radyo Naga ki Crisostomo Plopinio, Election Officer III kan Comelec Sipocot, sinaysay kaini na basado naman sa saiyang naeksperyensiyahan, nagdadagsa an mga maparehistro sa saindang opisina sa oras na kan deadline.
Huli digdi, nagpagirumdom an opisyal na an saindang computer na piggagamit sa pagrehistro kan mga botante an nakaprogram. Kun kaya, enkaso mag-abot na an aldaw kan deadline, maluwas man na sarado na an registration. Kun kaya an mga mahabol pa pakatapos kan deadline an dae namakakapagpareshistro nin huli ta dae na ini magana pa.
Sigun pa ki Plopinio, nagtao soboot an COMELEC nin bastanteng aldaw o bulan tanganing makapagrehistro an mga tawo.
Mientrastanto, pig-enkaminar man kan opisyal an mga dae pa nagpaparehistro na magparehistro na asin dae na paghalaton pa an aldaw kan deadline sa Setyembre 30.
