Tinawan duon ni dating Special Disbursing Officer (SDO) kan Office of the Vice President (OVP) Gina Acosta na imbuelto an security officer kan OVP sa pagdevelop nin mga programa asin aktibidad para sa confidential operations kan ahensya.
Sa pagpapadagos kan ika-16 na Aldaw kan pagbista sa impeachment, inadmitir ni Acosta na siya nakakakua nin impormasyon asin pinansyal na mga plano para sa paggamit nin mga kompidensyal na pondo gikan sa Vice Presidential Security and Protection Group (VPSPG) Commanding Officer Colonel Raymund Dante Lachica.
Si Atty. Iprinesentar ni Amando Ligutan an OVP Program asin Financial Plan na igwa nin mga programa, aktibidad asin proyekto sa irarom kan Seksyon na inaapod na Good Governance Program kun sain segun ki Acosta, kabale sa confidential activities an Libreng Sakay Program asin Financial Medical Assistance kan OVP.
Aminado si Acosta na tinatawan siya ni Lachica nin mga inputs asin guidelines dapit sa confidential operations.
Sinabi pa kaini na kaiba kan OVP si Lachica sa pag-conceptualize kan mga programa asin aktibidad na magagamit nin confidential funds asin ini “approved by” o inaprobaran ni VP Duterte.
Mientrastanto, pigtuyaw ni Senador-judge Erwin Tulfo si Acosta huli ta garo baga grabe an kadipisilan sa pagtaram nin Tagalog mantang base sa House transcripts kan hearing na ginibo kan Nobyembre 2024, nagtataram nin Tagalog si Acosta.
Enot pa sa pagpoon kan pagbista, naghagad si Acosta kun pwede sana siyang magtaram sa Visayan huli ta nadedepisilan siyang magtaram nin Tagalog.
Nagkomento si Tulfo na dapat magpundo na si Acosta sa pagdaya sa sainda huli ta malinaw sa hearing transcripts na nakakasabot asin nakakataram nin Tagalog an witness.
